Downdetector platformasynyň maglumatlaryna görä, 12-nji iýun gijesi uly sanly hyzmatlaryň birnäçesiniň işinde giň gerimli näsazlyk ýüze çykdy.
Ulanyjylar Google hyzmatlaryny – Cloud, Drive, Meet, Gmail, şeýle-de gözleg ulgamy we YouTube wideohostingini ulanmaga synanyşanlarynda kynçylyklar bilen ýüzbe-ýüz bolandyklaryny habar berdiler. Google Cloud sahypasynda näsazlygyň dünýäniň köp sebitlerine täsir edendigi görkezilýär. Kompaniýa näsazlygyň bardygyny tassyklady.
Şeýle hem Spotify, Amazon Web Services, Cloudflare, Discord, Snapchat we beýleki platformalaryň işinde hem näsazlyklaryň ýüze çykandygy habar berilýär.
OpenAI kompaniýasy ChatGPT çat-botuna girmek bilen baglanyşykly kynçylyklar barada habar berdi.
Cloudflare öz hyzmatlarynyň käbirinde «wagtal-wagtal näsazlyklaryň» ýüze çykýandygyny mälim etdi. Şol bir wagtyň özünde, Aşgabadyň wagty bilen sagat 00:12-de kompaniýa hyzmatlaryň dikeldilip başlanandygyny habar berdi.
Google bolsa, sagat 00:30-da inženerleriniň Google Meet-de ýüze çykan näsazlyklardan galan ähli bökdençlikleri düzedendigini aýtdy.
