WhatsApp messenjeriniň işläp düzüjileri täze funksiýany – emeli aň esasynda şahsylaşdyrylan çat-botlary döretmek mümkinçiligini synag edip başladylar. Bu barada «WABetaInfo» portaly habar berýär. Täzelik iOS operasion ulgamynda işleýän enjamlara degişli.
Ulanyjylar çat-bot üçin at, daşky görnüş, gepleşik stili we maksat saýlap bilerler. Mysal üçin, okamak üçin wirtual kömekçi, motiwasiýa berýän tälimçi ýa-da syýahatçylyk gollanmasy hökmünde bot döretmek mümkin. WhatsApp emeli aň arkaly botuň awatar suradyny döredýär we gepleşik stiliniň wariantlaryny hödürleýär – asuda, joşgunly, degişgen we beýlekiler.
«WhatsApp ulanyjynyň isleglerine görä emeli aňyň özüni alyp barşyny we gepleşik stilini düzmäge kömek edýän „akylly“ teklipleri hödürlär» — diýip, «WABetaInfo» ýazýar.
Funksiýany häzir käbir beta ulanyjylary synag edýärler. Köpçülikleýin işe giriziljek senesi barada häzirlikçe resmi maglumat ýok.
Ýeri gelende aýtsak, şuňa meňzeş mümkinçilikler Android wersiýalary üçin hem hödürlenipdi. Şeýle hem belläp geçmek gerek, şahsylaşdyrylan çat-botlary diňe Meta AI tehnologiýasy elýeterli bolan sebitlerdäki ulanyjylar döredip bilerler.
