Hindistanyň Tikamgar şäherinde (Madhýa-Pradeş ştaty) öňki Tal Koti köşgüniň binasynyň aşagyndan 50 000 sany seýrek kitap ýygyndysy bolan gizlin kitaphana tapyldy. Gymmatly tapyndy hakda Times of India ýazýar.
Tal Koti binasy häzir kollej hökmünde ulanylýar. Gizlin kitaphanany etrabyň salgyt gözegçisi bolup işleýän ýerli işgär Wiwek Kşotriýa tapdy. Ene-atasynyň ýerasty hazyna hakda aýdan hekaýatlaryny ýada saldy we olary barlamak kararyna geldi. Binany gözden geçirenden soň, onuň aşagyndaky ýapyk otaglary açmagy buýurdy.
Içerde kitaply we golýazmaly tekjeler tapyldy. Olaryň käbiri gowy saklanyp galypdyr, beýlekilerine termitler zeper ýetipdir. Tapyndylaryň arasynda Feliks Topolskiniň “Gandiniň eskizleriniň” atly seýrek neşiri, hindi knýazlyklarynyň taryhyna degişli kitaplar we sanskrit dilindäki özboluşly golýazmalar bar. Kitaplaryň köpüsinde Orçhanyň Prezident kitaphanasynyň möhri bar.
Kitaphana bäş gatdan ybarat. Ol 20 ýyldan gowrak ozal eden maliýe galplygy sebäpli işinden aýrylan kitaphanaçy bilen baglanyşykly dawa-jenjelden soň ýapylypdyr.
Zeper ýeten kitaplar ekspertlere geçirildi we kataloglaşdyryş işleri başlandy. Kşotriýa kitaphananyň esasynda medeni merkez döretmegi meýilleşdirýär we bu taslama üçin hökümetden serişde sorady. Binanyň alymlar, taryhçylar we jahankeşdeler üçin özüne çekiji ýer boljakdygyna ynanýar.
