Hindistanyň kosmos gözlegleri guramasy (ISRO) 2025-nji ýylyň dekabrynda orbita gumanoid robot bilen kosmos gämisini ibermegi meýilleşdirýär. Bu barada guramanyň başlygy Wanniýaperumal Naraýananyň sözlerine salgylanyp, Odisha Bytes habar berýär.
Roboty ibermek 2027-nji ýylyň martynda durmuşa geçirilmegi meýilleşdirilýän ekipažly “Gaganýan” missiýasyna taýýarlygyň bir bölegi bolar.
Uçuşyň dowamynda zenan keşbi bilen döredilen Wiommitra atly robot gäminiň esasy ulgamlaryny, şol sanda ýaşaýyş üpjünçilik ulgamyny we uçuşyň dolandyrylyşyny barlar. Naraýananyň habar bermegine görä, 2026-njy ýylda ýene iki uçarmansyz uçuş meýilleşdirilýär.
“Gaganýan” taslamasy 2018-nji ýylda Hindistanyň premýer-ministri Narendra Modi tarapyndan yglan edildi. Ilkibaşda ekipažly uçuş 2022-nji ýyla meýilleşdirildi, ýöne COVID-19 pandemiýasy we beýleki sebäpler bilen soňa goýuldy.
Missiýa üçin niýetlenen kosmos enjamy ISRO tarapyndan döredildi. Ol üç adamdan ybarat ekipaža niýetlenýär. Uçuş üstünlikli bolan ýagdaýynda Hindistan Russiýadan, ABŞ-dan we Hytaýdan soň kosmosa özbaşdak ekipažly uçuşy amala aşyran dördünji döwlet bolup biler.
