Enj Postekoglu Londonyň «Tottenhem» futbol klubunyň baş tälimçiliginden gitdi. 59 ýaşly gresiýaly hünärmeniň wezipeden boşadylandygy barada toparyň metbugat gullugy resmi taýdan habar berdi.
Postekoglu «Tottenhemiň» Ýewropa ligasynda ýeňiş gazanmagyndan iki hepde soň işden boşadyldy. Klubuň ýolbaşçylygy bu karary Angliýanyň Premýer ligasyndaky (APL) kanagatlanarsyz netijeler bilen düşündirdi.
«Ol kluba däp bolan hüjümçilik stilini yzyna getirdi, şeýle hem geçen aý Bilbao şäherinde UEFA-nyň Ýewropa ligasynda gazanan ýeňşimiz bilen taryhymyza täze sahypa ýazdy – bu üstünlik ýadymyzda hemişelik galar. Enjiň kluba bolan ygrarlylygy we iki ýyllyk hyzmaty üçin çäksiz minnetdarlyk bildirýäris.
Emma direktorlar geňeşi klubuň bähbidi üçin üýtgeşmäniň zerurdygy baradaky karary biragyzdan kabul etdi. 2023/24 möwsümine üstünlikli başlanamyzdan soň, Premýer-liganyň soňky 66 oýnunda 78 utuk topladyk, bu bolsa taryhymyzda Premýer-ligadaky iň pes netijämiz boldy. Kämahal käbir sebäpler hem bardy: şikesler we soňra Ýewropa ýaryşlaryny ileri tutmak karary. Bu möwsümde Ýewropa ligasynda gazanan ýeňşimiz klubumyzyň taryhyndaky iň beýik pursatlaryň biri bolsa-da, bu ýeňşiň getiren duýgularyna esaslanyp karar kabul edip bilemzok.
Birnäçe ugurda bäsleşmäge ukyply bolmak biziň üçin örän wajyp, çemeleşmeleri üýtgetmegiň geljekki möwsümde we ondan soňky döwürde üstünlik gazanmak mümkinçiligimizi artdyrjakdygyna ynanýarys» — diýlip, «Tottenhemiň» beýanatynda aýdylýar.
Postekoglu toparyň baş tälimçiligine 2023-nji ýylyň tomsunda «Seltikden» geçipdi. Ol «Tottenhemde» iki möwsüm işledi – birinji möwsümde topar Angliýanyň çempionatynda bäşinji orny eýeledi, ikinjisinde bolsa on ýedinji boldy. Ýewropa ligasynda gazanylan ýeňiş topara soňky 17 ýyldaky ilkinji kubogyny getirdi.
