Germaniýanyň Oşersleben ýaryş ýolunda «Mercedes-Benz eActros» elektrikli ýük ulagy ýarym tirkeg bilen yzlygyna 124,7 kilometr ýol geçip, Ginnesiň rekordlar kitabyna girdi. Bu barada «New Atlas» habar berýär.
Ulagyň rulunda 50 ýaşly awtoýaryşçy Marko Hellgrewe otyrdy. Ýöriş 6 sagat 22 minut dowam etdi. Bu wagtyň dowamynda, ol ortaça 20 km/sag tizlik bilen hereket edip, 476 gezek öwrüm etdi.
Bu kategoriýadaky öňki rekord 2020-nji ýylda goýlupdy – 89,1 kilometr. «eActros» şeýle netijäni gazanan ilkinji elektrikli ýük ulagydyr.
Ertesi gün «eActros» adaty ýollara çykdy. Polisiýanyň ulaglarynyň gatnaşmagynda, ol yzlygyna ýene 30 kilometr ýol geçdi. Bu bölek resmi rekorda girenok, emma bu tehnologiýanyň hem-de sürüjiniň mümkinçilikleriniň goşmaça görkezmesi boldy.
Bu ýörişe «eActros 600» flagman modeli gatnaşdy. Onda 621 kWt·sag sygymly elektrik batareýasy ýerleşdirilen. Bu batareýa doly ýük bilen 500 kilometre çenli ýol geçmäge mümkinçilik berýär. Ulagyň kuwwaty – 816 at güýjüne deň. Öndürijiniň hasaplamasyna görä, 10 ýylyň dowamynda we 1,2 million km ýol geçilenden soň hem batareýanyň sygymynyň azyndan 80%-i saklanyp galýar.
