Amerikaly aktýor Denzel Waşington “Gara Babyr” franşizasynyň üçünji bölüminde surata düşer. Bu maglumaty super gahrymançylykly filmiň režissýory Raýan Kugler "E News" gazetine beren interwýusynda tassyklandy.
Waşingtonyň özi ozal Kugler üçin ýörite keşp döretmek isleýändigini aýdypdy. Režissýor bu maglumaty: "Munda hiç hili toslama zat ýok" diýip tassyklady.
"Denzel – bu eýýäm maşgala. Men onuň bilen ilkinji günden bäri işleşmäge synanyşýaryn. Meniň pikirimçe, ol häzirki aktýorlaryň iň beýigi" -diýip, Kugler sözüniň üstüne goşdy.
Şeýlelikde, Oskar baýragynyň eýesi Waşington Letisiýa Raýt, Danaý Gurira, Lupita Niongo we Uinston Dýuk daga goşular. Waşingtonyň takyk haýsy keşbi ýerine ýetirjegi entek aýan edilmedi.
2024-nji ýylda aktýor “Otelloda” baş keşbi janlandyrmagy, soň bolsa korol Liri oýnamagy we karýerasyny tamamlamagy meýilleşdirýändigini aýtdy. Şonda ol "özüne diňe iň gowular bilen işlemegiň gyzyklydygyny" aýdypdy.
“Gara Babyr 3-iň” çykjak senesi entek belli däl. Birinji filmi 2018-nji ýylda, ikinji bölümi - 2022-nji ýylda çykypdy.
