Mattel oýnawaç öndürijisi Mattel Studios ady bilen hususy kinostudiýasynyň açylandygyny mälim etdi. Ol kompaniýanyň meşhur oýnawaçlarynyň esasynda filmleri we seriallary düşürer diýip, Deadline habar berýär.
Täze bölümçe kompaniýanyň kino we teletaslamalaryň önümçiligi bilen meşgullanýan ähli bar bolan ugurlaryny birleşdirer. Studiýa ozal Mattel Films-iň prezidenti wezipesini eýelän Robbi Brenner ýolbaşçylyk eder.
“Mattel kompaniýasy öz brendlerini we personažlaryny kinoda täzeçe görkezmek üçin häzirki döwrüň beýik zehinlerini işe çekdi. Men özboluşly wakalary diňe bir filmlerde däl, eýsem seriallarda janlandyrmak mümkinçiligi üçin minnetdar” – diýip, Brenner neşir bilen söhbetdeşlikde aýtdy.
Mattel Studios eýýäm 14 taslama taýýarlaýar. Olaryň biri Monster High gurjaklaryna esaslanýan film bolar we onuň režissýory hökmünde “M3GAN” horrory bilen tanalýan Jerard Jonstoun çykyş eder. Şeýle-de, Polly Pocket gurjaklary we Matchbox oýnawaç awtomobilleri barada filmler taýýarlanýar.
Ýatlap geçsek, Warner Bros. studiýasy 2023-nji ýylda Mattel-iň ygtyýarnamasy bilen “Barbi” filmini çykardy. Lenta 1,4 mlrd dollar ýygnap, ýylyň iň girdejili filmi boldy.
