Ýaponiýanyň Waseda uniwersitetiniň fizikleri kontakt linzalar üçin ýagtylygy geçirýän, ýöne elektronika hem-de dürli senagat we lukmançylyk enjamlary tarapyndan döredilýän zyýanly elektromagnit tolkunlaryny saklaýan açyk reňkli nano-örtük döretdiler. Bu barada uniwersitetiň metbugat gullugy habar berdi.
«Häzirki wagtda jemgyýetde elektronika ornaşdyrylan „akylly“ kontakt linzalary döretmek pikiri uly gyzyklanma döredýär. Eger beýle tehnologiýalar döredilse, onda gözümiz şeýle linzalaryň aragatnaşyk ulgamlaryndan çykan elektromagnit tolkunlaryna gönüden-göni täsir eder. Bu tolkunlardan goramak üçin biz iki ölçegli materiallaryň esasynda ýörite örtük döretdik» — diýip, professor Takeo Miýake aýtdy.
Alymlar geçiş metallarynyň we uglerodyň atomlaryndan, şeýle-de azot, flor ýa-da kislorod ýaly elementlerden düzülýän iki ölçegli materiallar bolan maksenleri ulandy. Olar metallara meňzeş aýratynlyklara eýedir. Fizikler titan karbidi esasynda maksenden taýýarlanan örtükleri döretdi. Bu örtükler görünýän ýagtylygyň 90%-ini geçirýär, emma «akylly» linzalardan çykýan elektromagnit tolkunlaryny saklaýar.
Şeýle örtük bilen taýýarlanan linzalaryň prototipleri haýwanlarda synag edildi. Örtük giň ýygylyk diapazonlarynda elektromagnit şöhlelenmäniň, takmynan, 93%-ini dargadyp, ony göz üçin has az zyýanly bolan infragyzyl tolkunlara öwürdi.
Barlagçylar maksenden taýýarlanan örtükleriň dürli materiallara ulanylmagynyň mümkinçiligini belläp geçýärler. Ýokary bioutgaşyklyk aýratynlygy sebäpli, olar diňe bir kontakt linzalarda däl, eýsem, lukmançylyk elektronikalarynda we implantatlarda-da ulanylyp bilner.
