Mercedes-Benz kompaniýasynyň Raştattdaky (Germaniýa) zawodlarynda täze nesil «CLA-nyň» önümçiligine başlandy. Ol brendiň elektrokarlar üçin ýörite döredilen «Mercedes Modular Architecture» (MMA) platformasynyň binýadyndaky ilkinji elektromobilidir.
Häzirki wagtda hatarda iki wersiýa bar: 272 at güýjündäki «CLA 250+» we 356 at güýjündäki «CLA 350 4MATIC». Soňra «Mercedes-AMG» tarapyndan sport we gibrid görnüşleriniň hem çykarylmagyna garaşylýar.
Täze model merkezi serwer arkaly programma üpjünçiligini geçirmäge mümkinçilik berýän Mercedes-Benz Operating System (MB.OS) ulgamy bilen enjamlaşdyrylan. Önümçilikde emeli aň tehnologiýalary ulanylýar, munuň netijesinde zawodda energiýanyň sarp edilişi 20% azaldylýar.
«CLA» modeli WLTP aýlawyna görä, 792 kilometre çenli ýol geçip bilýär. 800 woltlyk tiz zarýad ulgamy 10 minutda 325 km ýol üçin ýeterlik kuwwaty ýygnamaga mümkinçilik berýär. Iň ýokary zarýad kuwwaty – 320 kWt-a çenli.
