Müsürde ozal näbelli üç mazar tapyldy. Açyş Patyşalar jülgesiniň golaýynda, Nil derýasynyň günbatar kenarynda ýerleşen Luksordaky arheologik gazuw-agtaryş işlerinde mahalynda edildi diýip, Müsüriň Syýahatçylyk we gadymyýet ministrligine salgylanýan Daily Mail habar berýär.
Mazarlar Dra Abu el-Naga sebitinde - Tutmos II we beýleki faraonlar ýaly, ýokary wezipeli adamlaryň mazarlarynyň tapylan toplumynda ýerleşýär. Arheologlaryň berýän maglumatlaryna görä, täze tapyndylar ýokary derejeli adamlara degişlidir, ýöne olaryň asly şa neslinden däldir. Olar çen bilen Täze Patyşalyk döwründe, ýagny miladydan öňki XVI-XI asyrlarda ýaşapdyrlar. Bu mazarlaryň ýaşynyň 3500 ýyl töweregidigini aňladýar.
Barlagçylar mazarlaryň diwarlaryndaky ýazgylary okadylar we jaýlananlaryň atlaryny kesgitlediler. Şolardan biri Amon ybadathanasynyň gullukçysy Amon-em-Ipetdir. Onuň gubury doly diýen ýaly weýran bolupdyr. Ikinjisi, däne ammaryna jogapkär bolan Baki atly bir adama degişlidi. Üçünji mazarda Amon ybadathanasynyň gözegçisi, kätip we hasylly ýerleriň dolandyryjysy bolup işlän "S" diýen biri aram tapypdyr.
Hünärmenler bu açyşy ähmiýetli hasaplaýarlar we bu adamlaryň durmuşy barada has köp maglumat almaga umyt edýärler. Olar barlaglaryň köp ýyllardan bäri dowam edýändigine garamazdan, Patyşalar jülgesiniň we onuň töwereginiň täze syrlary açmagyny dowam etdirýändiklerini nygtaýarlar.
