Ispaniýanyň milli ýygyndysy UEFA-nyň Milletler ligasynyň ýarym finalynda Fransiýany 5:4 hasabynda utdy. Oýun Ştutgartda geçirildi.
Oýnuň dowamynda ispanlar iki gezek hasapda dört gol tapawudy saklady (4:0 we 5:1), ýöne soňky minutlarda has rahatlanyp, fransuzlara tas kambek etmäge mümkinçilik beripdi.
Oýunda hasaby 22-nji minutda Niko Uilýams açdy. Üç minutdan Mikel Merino toparyň artykmaçlygyny iki esse artdyrdy. Mikel Oýarsabal iki assist etdi. 54-nji minutda Lamin Ýamal bellenilen penaltini ýerine ýetirmegi başardy, 55-nji minutda bolsa Pedri hasaby 4:0 etdi.
Fransiýa 59-njy minutda Kilian Mbappeniň penaltiden girizmegi bilen bir gol gazandy. 67-nji minutda Ýamal ikinji goluny girizdi. 79-njy minutda fransuzlar oýny janlandyryp başlady: howada owadan urgy bilen Raýan Şerki tapawutlandy. 84-nji minutda ispanlaryň goragçysy Dani Wiwian topy öz derwezesine girizdi. Ahyrky 5:4 hasaby 94-nji minutda Randal Kolo-Muani kesgitledi.
Şeýlelikde, Ispaniýanyň milli ýygyndysy yzygider üçünji gezek ýaryşyň finalyna çykdy. 2022/2023 möwsüminde ispanlar ýarym finalda Italiýany (2:1), finalda bolsa penalti boýunça Horwatiýany (0:0, penalti 5:4) utupdy. 2020/2021 möwsüminde hem olar Italiýany utdy (2:1), ýöne finalda Fransiýadan utuldy (1:2).
2024/2025 möwsüminiň Milletler ligasynyň finaly 9-njy iýuna geçilýän gije bolar. Ispaniýanyň milli ýygyndysy Portugaliýanyň topary bilen duşuşar. Ondan birnäçe sagat öň ýaryşyň bürünç medalynyň eýesi kesgitlener – üçünji ýer üçin oýunda Germaniýanyň we Fransiýanyň ýygyndylary oýnar.
