Ýuwaş ummanynda Hytaýdan Meksika üç müň awtomobil alyp barýan Morning Midas ýük gämisi ýandy. Bloomberg agentliginiň maglumatlaryna görä, bortda Chery Automobile Co. we Great Wall Motor ýaly hytaý awtoöndürijileriniň ulaglary bardy.
Liberiýanyň baýdagy bolan gämi 26-njy maýda Ýantaýdan (Şandun welaýaty, HHR) ugrady. Ol Hytaýyň birnäçe portuna bardy we 15-nji iýunda Meksikanyň Lasaro-Kardenas portuna gelmelidi.
Ýangyn 3-nji iýunda gämi Adak adasyndan (Alýaska), takmynan, 500 km uzaklykda wagty palubalaryň birinde başlady. Ýangynyň sebäpleri heniz belli däl.
Ekipaž ýangyny söndürmäge synanyşdy, ýöne şowsuz boldy. ABŞ-nyň Kenarýaka goragy 22 adamyň ählisini ewakuasiýa etdi. 4-nji iýunda edara ýangynyň dowam edýändiginiň ýa-da ýokdugynyň belli däldigini, ýöne bortda tüssäniň saklanýandygyny habar berdi.
Kenarýaka goragynyň maglumatlaryna görä, gämide 3159 ulag bardy. Olardan 65-isi doly elektrik, 681-isi gibrid. Agentligiň çeşmeleri palubada bir elektromobiliň ot alyp bilendigini çaklaýar, ýöne haýsy markanyňkydygy görkezilmeýär.
