Gazagystan ownuk hemralary orbita uçurmak üçin öz ultra-ýeňil raketa göterijisini döretmekçi bolýar. Bu barada Gazagystanyň Mejlisiniň Senatynyň agzasy Andreý Lukiniň beren beýanyna salgylanýan Informburo.kz habar berýär.
Onuň sözlerine görä, raketa 500 kilograma çenli bolan gerekli ýüki Ýeriň pes orbitasyna çykaryp biler. Lukin bu taslamanyň Gazagystan üçin iş ýüzünde amala aşyryp boljak we maksadalaýyk hasaplanýandygyny aýtdy.
Ol şeýle raketalaryň az ýangyç talap edýändigini, olara hyzmat etmegiň aňsatdygyny we çylşyrymly ýerüsti infrastrukturasyny talap etmeýändigini düşündirdi. Şeýle hem olar uçurmak üçin köp hünärmeniň gatnaşmagy gerek bolmaz diýip çaklaýarlar.
Senator dünýäniň kosmos senagatynyň ownuk hemralary we kubsatlary ulanmaga has işjeň geçýändigini aýtdy. Olar telekommunikasiýa, gözegçilik we bilim taslamalarynda ulanylýar. Lukin mysal hökmünde Amerikanyň Rocket Lab hususy kompaniýasynyň Electron raketa göterijisine salgylandy. Ol indi birnäçe ýyl bäri gerekli ýükleri orbita çykarmakda ulanylýar.
Electron raketasy häzirki wagtda orbital uçuşlaryň sany boýunça dünýäde üçünji orunda durýar we bu ornuny ruslaryň Soýuz-2-si bilen paýlaşýar. Uçuryşlaryň sany boýunça olardan öňde diňe Falcon 9 we Hytaýyň Long March 2-si durýar.
