«Ahyrky nokat: Gan baglanyşyklary» («Final Destination Bloodlines») horror filmi 17-nji iýunda sanly görnüşde elýeterli bolar diýip, «WhenToStream» portaly habar berýär.
«Warner Bros.» studiýasynyň filmi ilkinji gezek maý aýynyň ortalarynda dünýä boýunça prokata çykdy we 50 million dollarlyk býujeti bilen 229 million dollar gazandy. Filmiň sýužeti talyp gyz Stefani (Keýtlin Santa Huana) barada gidýär. Ol öz maşgalasyny ýowuz heläkçiliklerden halas etmek üçin dogduk şäherine dolanýar.
Taslamada Toni Todd hem çykyş edýär. Ol franşizanyň dördünjiden galan ähli bölümlerinde patologoanatomyň keşbinde çykyş edipdi. Aktýor 2024-nji ýylyň güýzünde aradan çykypdy.
Franşizanyň altynjy bölüminiň režissýorlary hökmünde Zak Lipowski bilen Adam B. Steýn çykyş edýär. Bu film seriýadaky filmleriň arasynda tankytçylardan iň ýokary bahany aldy: «Rotten Tomatoes-da» 92%, «Metacritic-de» bolsa 100-den 73 bal aldy.
