Müsüriň häkimiýeti Jirian ady bilen täze şäheriň gurluşygynyň başlanandygyny mälim etdi diýip, Reuters agentligi habar berýär.
Şäher çölde, Kairden 42 km günbatarda, 6,8 mln inedördül metr meýdanda ýerleşer.
Jirian meýdany 2,28 mln akr bolan has uly “Täze delta” oba hojalyk taslamasynyň bir bölegi bolar. Bu zolagy suwarmak üçin her gün ol ýere Nilden, takmynan, 10 mln kub metr suw iberiler, bu ýurduň ýyllyk suw kwotasynyň, takmynan, 7%-ine deňdir. Şeýlelikde, täze şäher we meýdan Niliň hasylly deltasynyň deregine ulanylar.
Taslama aýna fasadly kaşaň jaýlaryň, şeýle-de täjirçilik zolaklarynyň, gämi duralgasynyň we erkin ykdysady zolagyň gurluşygyny göz öňünde tutýar.
Müsüriň premýer-ministri Mustafa Madbuli döwletiň “suw ýetmezçiliginiň, energetika meseleleriniň we ykdysady kynçylyklaryň bolýan döwründe ýer bahasyny ýokarlandyrmak we maýa goýumlary çekmek üçin adaty däl we innowasion çemeleşmeleri ulanmaga ýykgyn edýändigini” aýtdy.
