Müsürde 2025-nji ýylyň 3-nji iýulynda Uly Müsür muzeýini açmak meýilleşdirilýär. Şol günden syýahatçylar ähli ekspozisiýalara, şol sanda Tutanhamonyň zalyna we Hufunyň gaýyk muzeýine girip biler diýip, Tourprom.ru habar berýär.
Toplumyň gurluşygy 2002-nji ýylda başlady, onuň açylyşy bolsa 2020-nji ýyla meýilleşdirilipdi. Ýöne möhlet yzygiderli yza süýşürildi. Geçen ýylyň oktýabr aýynda muzeý bölekleýin açyldy. Bu ýerde Gadymy Müsüriň taryhyndan 15 müň töweregi eksponat jemlenýär. Olaryň arasynda Kairiň, Luksoryň, Deltanyň we Aleksandriýanyň ammarlaryndan we muzeýlerinden getirilen gadymy artefaktlar hem bar.
2025-nji ýylyň 3-nji iýulyndan myhmanlar doly ekspozisiýany, şol sanda Tutanhamonyň aramgähinden 5 müň predmetden ybarat kolleksiýany we b.e. öň 2500-nji ýyllar töweregi döredilen Hufunyň gämisini görüp biler. Bu gämi Beýik piramidada tapyldy.
Uly Müsür muzeýi dünýäde iň uly arheologiki muzeý we häzirkizaman taryhynda şular ýaly iň gymmat toplumlaryň biri hasaplanýar. Onuň döredilmegine 1,2 mlrd dollar maýa goýuldy.
Muzeýiň ilkinji myhmanlary baýramçylyk çäreleri we muzeý boýunça eksklýuziw ekskursiýalar üçin ýörite petekleri satyn alyp biler. Açylyş güni bu petekleriň bahasy 5 müň dollardan 10 müň dollar aralygynda bolar.
