Polşada geçirilen Prezident saýlawlarynyň ikinji tapgyrynyň netijesine görä, oppozision konserwatiw partiýa bolan «Hukuk we adalat» partiýasynyň dalaşgäri Karol Nawroskiý sesleriň köplügini aldy. Bu barada «Gazeta Wyborcza» habar berýär.
Döwlet saýlaw komissiýasynyň sesleriň 100%-ini hasaplanyndan soňky maglumatlaryna görä, Nawroskiý sesleriň 50,89%-ini alyp, ýeňiji boldy. Onuň garşydaşy, häkimiýet başyndaky «Raýat koalisiýasy» partiýasynyň wekili we Warşawa şäheriniň häkimi Rafal Tşaskowskiý bolsa 49,11% ses aldy.
42 ýaşly Nawroskini 10,23 million raýat goldady. Ses berişlige gatnaşygyň derejesi 71,7% boldy.
Karol Nawroskiý – Polşada kommunizme garşy göreş boýunça ýöriteleşen taryhçy. Ol 2021-nji ýyldan bäri Milli ýatlama institutyna ýolbaşçylyk edip gelýär.
Karol Nawroskiý Prezidentlik wezipesinde partiýadaşy Anjeý Dudanyň ornuny tutar. Dudanyň ygtyýarlyklary awgust aýynda tamamlanýar. Ol 2015-nji ýyldan bäri iki möhlete Prezidentlige saýlandy, şol sebäpdenem üçünji gezek dalaş edip bilmeýär.
Polşada Prezident esasan dabaraly (seremonial) ygtyýarlyklara eýedir, emma ol parlament tarapyndan kabul edilen kanunlara weto (gadaganlyk) goýup bilýär.
