Ýewropanyň Futbol Assosiasiýalarynyň Birleşigi (UEFA) Çempionlar ligasy möwsüminiň netijesi boýunça “PSŽ” fransuz klubuna 148,4 mln ýewro tölär. Bu barada X sosial ulgamynda Football Meets Data habar berýär.
Bu mukdar 5:0 hasabynda tamamlanan “Inter” bilen final oýnundaky ýeňiş üçin 6,5 mln ýewrony öz içine alýar. Ýene 4 mln ýewrony klub UEFA-nyň Superkubogy ugrundaky oýna gatnaşýandygy üçin alar. Bu oýunda Luis Enrikäniň topary Ýewropa ligasynyň ýeňijisi – “Tottenhem” bilen duşuşar.
Çempionlar ligasynyň finalyna çykan “Inter” möwsümiň jemi boýunça 136,6 mln ýewro alar. Girdeji boýunça üçünji topar 117 mln ýewro gazanan Angliýanyň “Arsenaly” boldy.
Umuman, Çempionlar ligasynyň esasy tapgyryna gatnaşan 36 topar UEFA-dan 2,437 mlrd ýewro alar. Bu guramanyň ilkibaşda meýilleşdireninden sähel azdyr. Bu serişdeleriň ählisi birleşigiň TW we täjirçilik hukuklaryny satmakdan alýan girdejisidir. Düzgüne laýyklykda, UEFA girdejiniň 7%-ini öz hajatlary üçin alýar, galanlary klublara we federasiýalara paýlanýar.
Forbes-iň hasaplamalaryna görä, Çempionlar ligasynyň esasy tapgyryna gatnaşan 36 toparyň ählisi kepillendirilen ýagdaýda deň paý bilen 670 mln ýewro (hersi 18,62 mln ýewro) alar.
Netijeler üçin tölegler 914 mln ýewro bolar. Bu punkt üç kategoriýa bölünýär. Birinjiden, toparlar toparlaýyn tapgyrda gazanylan ýeňiş üçin (hersi 2,1 mln ýewro) we deňme-deňlik üçin (0,7 mln ýewro) pul baýragyny alýar.
Ikinjiden, pleý-off tapgyryna çykyş üçin bonuslar göz öňünde tutulan. Şeýlelikde, 1/8 finala gatnaşyjylaryň ählisi 11 mln ýewro, dörtden bir finala çykanlar 12,5 mln ýewro, ýarym finalçylar 15 mln ýewro, finalçylar 18,5 mln ýewro alýar.
Üçünjiden, toparçalar ýok ýagdaýynda toparlara ýaryşyň umumy tapgyrynda eýelenen gutarnykly orunlar üçin tölegler göz öňünde tutulýar. Mysal üçin, Metaratings.ru-nyň hasaplamasy boýunça, “Liwerpul” esasy tapgyrdaky birinji orun üçin UEFA-dan 12,5 mln ýewro – orun üçin 10,5 mln we ilkinji sekizlige girendigi üçin ýene 2 mln ýewro aldy.
