Apple kompaniýasy operasion ulgamlary belgileýiş usulyny düýpgöter üýtgetmegi meýilleşdirýär diýip, Bloomberg agentligi habar berýär.
Agentligiň çeşmeleriniň sözlerine görä, Apple-yň indiki operasion ulgamlary wersiýa belgisi boýunça däl-de, çykaryljak ýylyndan soňky ýyl boýunça atlandyrylar. Ýagny, iOS 18 wersiýasyna derek öň meýilleşdirilişi ýaly iOS 19 däl-de, iOS 26 çykarylar.
Beýleki operasion ulgamlaryň atlary hem şol usula görä üýtgediler – iPadOS 26, macOS 26, watchOS 26, tvOS 26 we visionOS 26.
Apple bu çözgüdi brendiň stilini birmeňzeş saklamak we müşderiler bilen programmistleriň bulaşmagynyň öňüni almak üçin kabul etdi. Häzirki wagtda operasion ulgamlaryň wersiýa belgileri biri-birinden tapawutly – iOS 18, watchOS 12, macOS 15 we visionOS 2, sebäbi olaryň ilkinji wersiýalary dürli ýyllarda çykarylypdy.
Apple-yň bu üýtgeşmeleri resmi taýdan 9-njy iýunda geçiriljek Bütindünýä işläp düzüjiler konferensiýasynda («WWDC») yglan etmegine garaşylýar.
Apple kompaniýasynyň wekili bu barada düşündiriş bermekden ýüz öwürdi.
Köp sanly iri kompaniýalar üçin belgileýiş tertibini üýtgetmek adaty ýagdaýdyr. Mysal üçin, Samsung kompaniýasy 2020-nji ýylda öz Galaxy S hatyndaky flagman smartfonlaryny çykan ýylynyň ady bilen atlandyryp, öňki Galaxy S10-dan soň göni Galaxy S20-ä geçipdi. Microsoft kompaniýasy hem 1995-nji ýylda operasion ulgamlaryny çykan ýyly bilen atlandyryp başlapdy – Windows 95, Windows 98, Windows 2000. Emma Apple-yň çemeleşmesi biraz tapawutlyrak: kompaniýa belgilerinde häzirki ýyly däl-de, geljek ýyly ulanar.
