iPhone 16 2025-nji ýylyň birinji çärýeginde dünýäde iň köp satylan smartfon boldy. Bu barada Counterpoint Research habar berýär. Ýaponiýada we Afrika ýurtlarynda islegiň artmagy we Apple-iň üstünlikli baha strategiýasynyň netijesinde esasy iPhone modeli ikiýyllyk arakesmeden soň birinji orna gaýdyp geldi.
Apple iň köp satylan smartfonlaryň global reýtinginiň ilkinji onlugynda bäş orny eýeledi. Bu ähli öndürijileriň arasynda iň gowy netijedir. iPhone 16, esasan, Ýaponiýada we Ýakyn Gündogaryň, Afrikanyň ýurtlarynda gowy satyldy.
iPhone 16 Pro Max we iPhone 16 Pro modelleri ikinji we üçünji orunlary eýeledi, ýöne Hytaýda olaryň satuwy arzan modellere goldaw berilmegi we Huawei bilen bäsdeşlik sebäpli azaldy. Muňa garamazdan, Pro wersiýa iPhone-yň umumy satuwynyň tas ýarysyny emele getirdi. Dördünji orunda iPhone 15 ýerleşdi, SE-ni çalşan iPhone 16e bolsa reýtingiň altynjy ornuna çykdy.
Samsung Galaxy S25 Ultra ýedinji orna düşdi. Ýöne S25 hatary kompaniýanyň umumy satuwynyň dörtden birini üpjün etdi.
Galaxy A16 5G geçen ýylyň birinji çärýegindäki reýting bilen deňeşdirilende bir orun ýokary galyp, bäşinji orny eýeledi. Model ýyllyk hasabynda 17% ösüş görkezdi, muňa Demirgazyk Amerika ýaly bazarlarda has elýeterli bolmagy ýardam etdi. Galaxy A06 hem gymmat bolmadyk smartfonlara islegiň artmagy netijesinde ilkinji onluga girip, ösüş görkezdi.
Reýtinge Apple we Samsung smartfonlaryndan başga giren ýeke-täk model Xiaomi-den Redmi 14C 4G boldy. Onuň satuwy geçen ýyl bilen deňeşdirilende 43% ýokarlandy.
Hünärmenler üýtgeşik funksiýalary bolan flagman gurluşlara islegiň artmagy sebäpli ilkinji on modeliň bazarda öz paýyny saklajakdygyny çaklaýar.
