Pawel Durowyň «Telegram» messenjeri bilen Ilon Maskyň «xAI» atly startapy «Grok» çat-botuny ýaýratmak maksady bilen, bir ýyllyk hyzmatdaşlyga geldiler. Bu barada messenjeriň esaslandyryjysy Pawel Durow «X» sosial torunda habar berdi.
Ol kompaniýanyň «xAI-dan» 300 million dollar aljakdygyny aýtdy. Mundan başga-da, «Telegram» arkaly «xAI» hyzmatlaryna ýazylan abunaçylardan gelýän girdejiniň 50%-i «Telegram-a» geçer.
Ulanyjylar «Grok» bilen «Telegram-yň» gözleg setiri arkaly aragatnaşyk gurap bilerler. Şol bir wagtda, «Grok» çatlaryň moderatory hökmünde hem bellenip bilner. Şeýle hem gysga habarlary giňeldip, has doly mazmuna öwrüp biler we çap edilen postlaryň faktlaryny barlap biler.
Soňra Ilon Mask Durowyň habaryny teswirläp, «hiç hili ylalaşyga gol çekilenok» diýip, belledi.
Jogap hökmünde Durow hem muny tassyklap, şeýle diýdi: «Dogry. Prinsipde ylalaşyk gazanyldy, ýöne resmileşdiriş işleri heniz tamanlanmady».
