Birleşen Arap Emirlikleriniň ýaşaýjylary tiz wagtdan dünýäde ilkinji bolup ChatGPT Plus-a – OpenAI-iň çat-botunyň tölegli wersiýasyna mugt elýeterli bolar. Bu OpenAI bilen BAE-niň hökümetiniň arasyndaky giň gerimli hyzmatdaşlyk taslamasynyň bir bölegidir diýip, The Economic Times neşiri ýazýar.
Ylalaşygyň çäklerinde Abu-Dabide uly Stargate UAE maglumat merkezi gurulýar. Onuň 200 megawatt kuwwatly ilkinji tapgyry indiki ýyl işe girizilmeli. Geljekde desga gigawatt kuwwatyny talap eder, bu hem ony emeli aň ulgamlary üçin niýetlenen dünýäde iň uly maglumat merkezleriniň birine öwrer.
Taslama ABŞ bilen hyzmatdaşlykda dürli ýurtlarda EA infrastrukturasyny ösdürmäge gönükdirilen Open AI for Countries başlangyjynyň bir bölegidir. OpenAI-iň baş direktory Sem Altmanyň aýtmagyna görä, programma EA-nyň lukmançylykda, bilimde we energetikada ulanylmagyny göz öňünde tutýar.
Taslama Oracle, Nvidia, Cisco, SoftBank ýaly kompaniýalar, şeýle-de EA pudagynda Ýakyn Gündogaryň lideri, Microsoft bilen hyzmatdaşlyk edýän G42 goşuldy. Taslamany durmuşa geçirmek bilen OpenAI öz mümkinçiliklerini giňeltmek üçin strategiki esas, BAE bolsa global EA pudagynyň merkezi hökmünde ornuny berkitmäge mümkinçilik alar.
Adatça, aýda 20 dollar bolan ChatGPT Plus-a mugt elýeterlilik ýurduň ýaşaýjylary üçin goşmaça ýeňillik bolar.
Taslama diňe bir maglumat merkezlerini döretmäge däl, eýsem emeli aňy ýerli dillere uýgunlaşdyrmaga, medeni kadalary berjaý etmäge we şahsy maglumatlary goramaga gönükdirilendir. Ylalaşygyň çäklerinde BAE ABŞ-da EA taslamalaryna öz infrastrukturasy üçin maýa goýumlar bilen deň mukdary maýa goýmaga borçlandy. Bu umumy maýa goýumyň 20 mlrd dollar bolup biljekdigini aňladýar.
