Hytaýyň Huawei kompaniýasy ýakynda uly tanyşdyrylyş dabarasyny geçirip, Nova 14 smartfon hataryny we ilkinji eplenýän noutbuk MateBook Fold Ultimate Design-y görkezdi. Indi kompaniýa Pura 80 flagman smartfonlarynyň hatary üçin täze premýera taýýarlanýar. Bu barada Gizmochina portaly habar berýär.
Insaýderleriň maglumatlaryna görä, hatara üç model girip biler: Pura 80, Pura 80 Pro we Pura 80 Ultra. Pura 80 Pro modelinde Huawei-niň özi tarapyndan işlenip taýýarlanan ýörite şekil datçigi ulanylar diýlip garaşylýar.
Täze hasabatda kompaniýanyň RYYB reňk süzgüji bilen 50 Mp 1 dýuýmlyk SmartSens SC5A0CS datçigini ulanyp biljekdigi aýdylýar. Ozal insaýderler smartfonda Sony IMX989 sensorynyň ulanyljakdygyny habar beripdi.
Ähtimal, Huawei bu datçigi synagdan geçirip, soňra öz önümini ulanmak kararyna gelen bolsa gerek.
Eger üýtgeşmeler diňe esasy sensora täsir etse, beýleki modullar öňküligine galyp biler. Öň, syzma maglumatlarda 50 Mp ultra giňburçly kamera we 50 Mp periskopik makrokamera barada gürrüň edilipdi. Sensorlaryň üçüsi-de RYYB süzgüjini ulanar, bu hem gowşak ýagtylykda suratyň hilini ýokarlandyrmaga mümkinçilik berer.
Şeýle-de, Pura 80 Pro-nyň 1,5K durulyk we LTPO tehnologiýasy bilen 6,78 dýuýmlyk OLED displeýini aljakdygy habar berilýär.
Huawei Pura 80 hatarynyň tanyşdyrylyşynyň 2025-nji ýylyň ikinji çärýeginde bolmagyna garaşylýar.
