Mihael Şumaheriň 2001-nji ýylda Monako we Wengriýa Gran Prisinde ýeňiji bolup, “Formula-1”-iň çempionlygyny alanda münen bolidi 15,98 million ýewro satyldy. Bu barada The New York Times habar berýär.
Ferrari F2001 24-nji maýda Monakoda RM Sotheby’s auksionyna çykarylypdy. Neşiriň berýän habaryna görä, söwda 8 million ýewrodan başlap, aýgytly çekeleşikde geçipdir. Alyjynyň ady aýan edilmeýär. Diňe onuň auksion goýumyny telefonda däl-de, zaldan goýandygy mälimdir.
Gyzgalaňly söwdalaşykda geçen Ferrari F2001 Şumaheriň auksionda satylan iň gymmat bolidine öwrüldi. Ondan gymmat bahadan diňe üç sany Mersedes ýaryş awtoulagy satylypdy.
The New York Times gazetiniň ýatladyşy ýaly, ýaryş awtoulagynyň rekord bahasyny şu ýylyň başynda 51,2 million ýewro satylan Mersedes W196 goýupdy. Bu awtoulag 1950-nji ýyllaryň ortalarynda Formula 1 ýaryşyna gatnaşypdy.
Mihael Şumaher Formula 1-iň ýedi gezek çempiony. Ol 2013-nji ýylyň ahyrynda fransuz Alp daglarynda lyžada typyp ýörkä agyr kelle-beýni şikesini aldy. Şondan bäri ol köpçülige çykanok. Häzir ol 56 ýaşynda. Onuň maşgalasy ýaryşçy sürüjiniň şahsy durmuşyny yhlas bilen goraýar.
