Amerikanyň Starfish Space hususy kompaniýasy orbitada synag missiýasyny geçirmäge taýýarlanýar. Iýun aýynyň ortalarynda Otter Pup 2 hemrasy kosmosa uçurylar. Onuň maksady - D-Orbit ION apparaty bilen sepleşmek. Manýowr elektrostatik gapjamanyň kömegi bilen amala aşyrylar.
Missiýanyň aýratynlygy D-Orbit ION-yň ýörite sepleşme mehanizmleri bilen enjamlaşdyrylmazlygydyr. Bu "taýyn däl hemra". Otter Pup 2 eliň aýasynyň ululygyndaky islendik tekiz ýere ýapyşmaly bolar. Eger synag üstünlikli bolsa, bu çemeleşme orbitada taýýarlyksyz dürli emeli hemralara hyzmat etmäge mümkinçilik döredip biler.
Missiýa tapgyrlaýyn amala aşyrylar. Uçurylandan soň, iki apparat biri-birinden ýüzlerçe kilometr daşlyga gider. Soňra Otter Pup 2 kem-kemden golaýlaşyp başlar. Bu manýowr geljekde orbitada emeli hemra hyzmat ediş amallaryny simulasiýa edýär.
Apparatyň howpsuzlygyny üpjün etmek üçin, ulgamda näsazlyk ýüze çykaýan ýagdaýynda-da, çaknyşyklary aradan aýyrýan ýörite traýektoriýalar ulanylýar. Iň pes tizlikde hereket ediler. Birinji sepleşme birnäçe minut dowam eder, şondan soň hemralar aýrylyşar we Otter Pup 2 howpsuz aralyga çekiler.
Häzirki wagtda ýangyjy gutaran ýa-da ulgamy hatardan çykan hemralar kosmos galyndylaryna öwrülýär. Bu missiýanyň üstünligi olaryň hyzmat ediş möhletini uzaltmaga, abatlamaga we orbitada ýangyç guýmaga mümkinçilik döredip biler. Bu esasanam gymmat geostasionar aragatnaşyk hemralary üçin möhümdir.
