«The Last of Us» («Biziň iň soňkymyz») serialynyň üçünji möwsüminde üns merkezinde Keýtlin Diwer tarapyndan ýerine ýetirilýän Ebbiniň keşbi bolar. Bu barada serialyň ikinji möwsüminde psihoterapewt Geýliň keşbini ýerine ýetiren aktrisa Ketrin O’Hara gürrüň berdi.
«Seriala gaýdyp gelerinmi, bilemok. Kreýg maňa indiki möwsümde bolmajagymy anyk aýtdy. Sebäbi ol möwsüm Ebbiniň hekaýasy barada boljakmyş... belki şeýledir. Dogrusy, meniň ýerine ýetiren keşbim esasan Joel bilen Elliniň arasyndaky aragatnaşyk üçin gerekdimikä diýip pikir edýän» — diýip, O’Hara «Variety» neşiri bilen gürrüňdeşliginde aýtdy.
Üçünji möwsümiň Ebbiniň hekaýasyna gönükdiriljekdigini oýnuň döredijilerinden biri bolan Nil Drakmann hem tassyklady. Onuň sözlerine görä, ol häzirki wagtda şouranner Kreýg Meýzin bilen bilelikde ssenariý toparyny düzýär. Bu iş tamamlanandan soň, «The Last of Us Part II» oýnunyň ekranlaşdyrylyşyny tamamlamak üçin dördünji möwsümiň gerek bolup-bolmajakdygy belli bolar. Oýnuň şol bölüminde Ebbi esasy keşpleriň biri bolup çykyş edýärdi, onuň hekaýasy hem Elli bilen parallellikde ösýärdi. Serialyň awtorlary şol gurluşy saklamak we Ebbiniň şahsy dramasy arkaly tomaşaçylaryň onuň edýän işlerine has gowy düşünmegini isleýärler.
Ikinji möwsümiň iň soňky bölümi 26-njy maýda görkeziler.
