Honda Motor strategiýasyny täzeden gözden geçirýändigini we elektrik ulaglarynyň önümçiligine maýa goýumlaryny azaldýandygyny yglan etdi. Kompaniýa 2030-njy maliýe ýylyna çenli elektrikli awtoulag satmak boýunça görkezijisini umumy satuwyň 30 göterimine çenli azaltdy diýip, kompaniýanyň baş direktory Tosihiro Mibeniň beren beýanatyna salgylanýan CarBuzz habar berýär.
Kompaniýa indi gibrid modellere ünsi jemlemekçi bolýar. 2031-nji ýyla çenli 10-dan 13-e çenli täze gibrid çykarmak meýilleşdirilýär. 2030-njy ýyla çenli ýyllyk satuwyň 2,2 million birlige ýetjekdigi we häzirki derejeden takmynan iki esse köp boljakdygy çak edilýär.
Strategiýanyň üýtgemegine täsir eden faktorlaryň biri-de gibridleri işläp taýýarlamagyň, elektrik ulaglar bilen deňeşdirilende, has arzan düşýänligidir. Bu kompaniýanyň girdejililigini ýokarlandyrmalydyr.
Honda-nyň ilkinji täze gibrid modelleri 2027-nji ýylda bazara çykar. Jikme-jiklikleri entek aýdylmady, ýöne deslapky maglumatlara görä, olaryň arasynda häzirki Honda Pilot-yň ornuny tutjak uly krossower bolar. Şeýle hem, bar bolan benzin-elektrik tehnologiýalaryny kämilleşdirmek meýilleşdirilýär.
Şol bir wagtyň özünde, Honda eýýäm işe girizilen elektrik ulagy taslamalaryndan ýüz öwürmeýär. Asyl dizaýnly sedany we krossoweri öz içine alýan 0 indeksli ulag maşgalasyny işläp taýýarlamak tamamlanar. Olar esasan Demirgazyk Amerikanyň bazaryna gönükdirilendir.
Meýilnamalara düzediş girizilendigine garamazdan, kompaniýa 2040-njy ýyla çenli elektrik ulaglaryna doly geçmek ugruny dowam etdirýär.
