Samsung Group kosmos infrastrukturasy pudagyna ornaşyp başlady. The Korea Economic Daily-nyň habar bermegine görä, Samsung C&T Corp. “kosmos zawody” taslamasyny işläp taýýarlaýar, ol raketalar üçin uçuş meýdançasyny öz içine alar.
Kompaniýa Seul milli uniwersitetiniň aerokosmos inženerligi kafedrasy bilen ylmy-gözleg merkezini döretmek barada gepleşikleri alyp barýar. Bu Samsung Electronics-iň gözleg bölümçesiniň ilkinji gezek kosmos pudagynda hünärmenleri işe alanyndan soňky ädimdir.
7-nji maýda Samsung Koreýanyň astronomiýa we kosmos ylymlary instituty bilen şertnama baglaşdy. Taslamanyň çäklerinde kompaniýa NASA-nyň Artemis II missiýasynyň düzüminde kosmosa iberiljek K-Rad Cube kubsaty üçin enjam işläp taýýarlar. Insitutyň beýanynda bellenilişi ýaly, “Samsung Electronics beýik orbitada güýçli radiasiýa şertlerinde özüniň indiki nesil ýarymgeçirijilerini barlar”.
Munuň bilen ugurdaş Günorta Koreýanyň häkimiýetleri kosmos ýarymgeçirijileriniň bäş görnüşiniň, şol sanda giroskoplaryň we mikrotolkun shemalarynyň önümçiligini ýerli etmek meýilnamalary barada habar berdi.
Analitikler Günorta Koreýanyň dünýäniň öňdebaryjy kosmos güýçleriniň bäşligine girip biljekdigini çaklaýar. Şol bir wagtyň özünde, Günorta Koreýa raketalar üçin uçuş meýdançalarynyň bazarynda lider bolmaga çalyşýan ýeke-täk ýurt däl. Taýwan we Beýik Britaniýa eýýäm şeýle meýdançalary gurýar. Ýanwar aýynda bolsa Şwesiýa kiçiräk raketalary uçurmak üçin Esrange Space Center toplumyny açdy.
Seraphim Space maýa goýum firmasynyň çaklamalaryna görä, dünýäniň kosmos bazary geljek on ýylyň dowamynda 1 trln dollara ýeter.
