Zäherli suwotylaryň aşa köpelmegi Günorta Awstraliýada akulalaryň adamlara hüjüm etmeginiň hem-de kenara zyňylmagynyň sebäbi hökmünde görkezilýär diýip, news.com.au habar berýär.
Ştatyň wise-premýeri Sýuzen Klouzyň sözlerine görä, bu suwotylaryň aşa köpelmegi akulalary gorkuzýar, şeýle-de olaryň zäherlenmegine sebäp bolýar. Zäherlenen akulalar bolsa has agras we hüjümçil bolýar. Klouz suwotylaryň köpelýän meýdanynyň Kenguru adasynyň meýdany (4405 km²) bilen deňdigini aýtdy. Käbir sebitlerde suwotylaryň köpelmegi 20 metr çuňluga çenli dowam edýär.
«Bu suwotylar balyklar üçin zäherli, olaryň köpelmegi balyklaryň özüni alyp barşynyň üýtgemegine sebäp bolýar. Şeýle hem akulalar kenara has ýakyn ýüzüp başlaýarlar. Mysal üçin, ol gün ölüp barýan bir ak akula Adelaidadaky Henli plýažynda kenara çykypdy» — diýip, Klouz aýtdy.
Suwotylaryň aşa köpelmegi diňe bir akulalara däl, eýsem beýleki deňiz jandarlaryna-da zyýan ýetirýär. «OzFish» atly täjirçilik däl guramanyň hasaplamalaryna görä, balyklaryň 200-e golaý görnüşi suwotylar sebäpli heläk bolýar. Klouzyň bellemegine görä, bu ýagdaý geçen ýyl deňizde dowam eden ýokary temperaturalaryň we şemalsyz howanyň netijesinde ýüze çykypdyr (şemal suwotylaryň köpelmeginiň öňüni alýar).
Suwotylaryň aşa köpelmegi deri asty ganöýmelerine-de sebäp bolup bilýär. Şeýle-de gijelerine suwotylaryň suwdan kislorody sorup alýandygy sebäpli, töwerekde ýüzýän balyklar demikmek howpuny başdan geçirýärler.
Klouz dynç alyş möwsüminde adamlara akulalaryň ýagdaýy bilen baglylykda, seresap bolmagy tabşyrdy.
