Fransiýanyň meşhur «Tur de Frans» welosiped ýaryşynyň soňky tapgyry ilkinji gezek Parižiň 18-nji etrabyndaky Monmartr depesinden geçer. Bu barada «Reuters» agentligi habar berýär.
«Tur de Frans» – 100 ýyldan gowrak wagt bäri Fransiýada we goňşy ýurtlarda geçirilýän iň meşhur we abraýly welosiped ýaryşydyr. Ýaryş 21 tapgyrdan ybarat bolup, her tapgyr bir gün dowam edýär. Geçilýän ýoluň uzynlygy 3 müňden 4 müň kilometr aralygynda üýtgeýär.
Ýaryşçylar üç gezek Lepik köçesi bilen Monmartr depesine çykyp, soňra Sakre-Kýor ybadathanasynyň eteginden geçip, ahyrynda 1975-nji ýyldan bäri ýaryşyň tamamlanýan ýeri hasaplanýan Ýeliseý meýdançasynda pellehana ýeterler. Geçen ýyl Olimpiýa oýunlaryna taýýarlyk görülýändigi sebäpli, ýaryş Nissa şäherinde tamamlanypdy.
Habar berilmegine görä, «Tur de Frans» ýaryşynyň guramaçylary Olimpiýa oýunlarynda geçirilen erkekler ýol ýaryşynyň üstünlikli geçmeginden ruhlanypdyrlar – bu ýaryşa 500 müňden gowrak tomaşaçy ýygnanypdy. Ilkibaşda Parižiň polisiýa prefekturasy aşa köp tomaşaçynyň ýygnanmagyndan howatyrlanyp, bu taslamany ret edipdi. Emma soňra bu pikiri Parižiň häkimligi we Fransiýanyň prezidenti Emmanuel Makron hem goldady.
Şu ýylky «Tur de Frans» 5-nji iýulda Lill şäherinden başlap, 27-nji iýulda tamamlanar. 14-nji we 21-nji iýul dynç günleri bolar.
