Fransiýanyň «Marsel» futbol kluby 2026/2027-nji ýyl möwsüminden başlap ulanyljak täze logotipini hödürledi.
Klubuň habar bermegine görä, täze logotipiň dizaýny toparyň taryhyndaky dürli döwürleriň elementlerini özünde jemleýär.
«"Marsel" kluby özüniň täze logotipini buýsanç bilen hödürleýär. Bu dizaýn klubuň taryhy bilen onuň wizual aýratynlygynyň döwrebap görnüşini birleşdirmek boýunça alnyp barlan hysyrdyly içki döredijilik işleriniň netijesidir. "Marseliň" täze logotipi klubuň özboluşlylygyny emele getirýän esasy simwollara esaslanýar.
Grafiki bezeg toparyň wizual taryhynyň birnäçe döwrüniň utgaşmasyna esaslanyp, öňki nyşanlaryň möhüm elementlerini gaýtadan janlandyrýar: olaryň arasynda 1973-nji ýylyň logotipinden ylham alnan ak halka, 1899-njy ýylyň nyşanyndan miras galan "M" harpynyň gurluşy, 1986-njy ýylyň logotipindäki egreltmeler we dinamiki çyzyklar, şeýle hem 1993-nji ýylyň nyşanyndaky meşhur goşa halka bar.
Täze wizual aýratynlyk bilen birlikde, doly täzelenen resmi web-saýt hem işe girizildi. Ol has döwrebap, düşnükli we janköýerler bilen has gowy aragatnaşygy üpjün etmek üçin döredildi. Bu özgerişlik arkaly "Olimpik Marsel" öz taryhyndan gözbaş alýan, geljekki nesiller üçin niýetlenen we klubuň ösüşiniň indiki tapgyrlaryna ýoldaşlyk etjek güýçli şahsyýetiň binýadyny tutýar» – diýip, «Marseliň» resmi saýtynda bellenilýär.
