Hytaý 2024-nji ýylyň degişli döwri bilen deňeşdirilende, kömürturşy gazynyň (CO2) zyňyndylaryny ilkinji gezek 1,6% azaltmagy başardy. Bu netije ýel, Gün we ýadro energiýalarynyň giňden ulanylmagy bilen gazanyldy diýip, «Carbon Brief» britan neşiri habar berýär.
Zyňyndylary ýurduň ähli künjeginde elektrik energiýasyna bolan islegiň ýokarlanmagyna garamazdan azaltmak başartdy. Hytaýda CO2 zyňyndylarynyň azalmagy ozal diňe energiýanyň sarp edilişiniň umumy peselmegi bilen baglanyşdyrylýardy. Bu üstünlik ilkinji gezek «ýaşyl» energetikanyň ösüşi bilen baglanyşykly boldy.
«Carbon Brief» neşiriniň maglumatlaryna görä, gaýtadan dikeldilýän energiýa çeşmeleriniň paýynyň artmagy Hytaýyň kömüre bolan garaşlylygyny peseltmäge mümkinçilik berdi. Bu bolsa 2021-nji ýylda başlan Hytaýyň 14-nji bäşýyllyk meýilnamasynyň möhüm bölegidir. Şol meýilnama boýunça täze energetika ulgamyna uly maýa goýumlary göz öňünde tutulýar.
Analitikleriň çaklamalaryna görä, 2030-njy ýyla çenli Hytaý dünýä boýunça elektrik energiýasynyň ýarysyndan gowragyny gaýtadan dikeldilýän çeşmelerinden öndürip başlar. Bu üstünlik bolsa dünýäde ekologik taýdan arassa energiýa geçmekde Hytaýyň öňdebaryjylygyny görkezýär. Şol bir wagtyň özünde, ABŞ ýaly käbir beýleki iri ýurtlar bolsa öz klimata degişli borçnamalaryndan yza çekilýär.
