«Lexus» kompaniýasy brendiň atmosferaly V8 hereketlendirijili iň soňky modeli boljak «IS500 Ultimate Edition» sedanynyň çäkli nusgada çykaryljakdygyny mälim etdi. Ulag jemi 500 nusgada öndüriler we diňe Demirgazyk Amerikada satuwa çykarylar.
Awtoulagyň kapotynyň aşagynda 472 at güýji bolan 5,0 litrlik V8 hereketlendiriji ýerleşýär, ol 395 Nm torky üpjün edýär. Sekiz basgançakly awtomatiki geçiriş karobkasy we yzky tekerlerden hereket getirilýän ulgamy bilen 0-dan 100 km/sag tizlige bary-ýogy 4,4 sekuntda ýetýär. Iň ýokary tizligi bolsa – 240 km/sag.
Dolandyryşy gowulandyrmak üçin, öň tarapyna 380 mm diametrli tormoz diskleri we gyzyl reňkli alty porşenli «Brembo» supporterler ornaşdyrylypdyr.
Awtoulag eksklýuziw «Wind» açyk çal reňke boýalypdyr, gara tekerler we açyk reňkli supporterler onuň daş keşbini tapawutlandyrýar. Interýerinde «Ultrasuede» we «NuLuxe» ýaly ýokary hilli materiallar ulanylypdyr, gyzyl nagyşly tikinler bolsa salona sport häsiýet berýär.
«Ultimate Edition-yň» bahasynyň «IS500» modeliniň başlangyç nyrhy bolan 60 müň dollardan ep-esli ýokary bolmagyna garaşylýar.
Bu model «Lexus-yň» atmosferaly V8 hereketlendirijili iň soňky awtoulagy bolup, brendiň taryhyndaky bir döwri tamamlaýar.
