Britaniýaly ultra-marafonçy Uilýam Guj 3800 km töweregi ylgap, 35 günde tutuş Awstraliýany geçdi. Ol ylgawa 15-nji aprelde Kotteslou kenaryndan başlap, ony 19-njy maýda garşy kenarda, Bondi kenarynda tamamlady. Ylgaw wagty ol özüniň 31 ýaşyny belledi.
Ylgawçy her gün, takmynan, 100 km geçdi – bu 2,5 marafona deňdir. Umuman alanyňda, Guj, takmynan, 90 marafon aralygyny geçdi. Şeýle-de bolsa, bu netije heniz Ginnesiň rekordlar kitaby tarapyndan tassyklanmady. Şol sebäpli rekord häzirlikçe Kris Ternbulla degişli, ol bu aralygy 2023-nji ýylda 39 günde geçdi.
Bir ýyl ozal şol bir aralygy awstraliýaly Nedd Brokmann hem ylgap geçdi. Ol 47 gün sarp etdi we haýyr-sahawat üçin millionlarça dollar ýygnady.
Guj öz ylgawyny 2018-nji ýylda rak keselinden aradan çykan ejesi Amanda bagyşlady. Ol Awstraliýanyň Rak bilen göreşmek boýunça geňeşi üçin serişde ýygnady.
“Ol meniň durmuşymda iň üýtgeşik adamdy… Ol meniň eden işime buýsanardy” – diýip, The Guardian onuň sözlerini getirýär.
Onuň aýtmagyna görä, şeýle uzak aralygy oňa agyr hasrat we ejesiniň ölüm howply kesel bilen göreşde görkezen güýji baradaky ýatlama kömek etdi.
Ylgawçy ilkinji dokuz günüň has agyr düşendigini aýdýar. Guj, köplenç, asla ýatmady diýen ýaly, ol ýoluny dowam etdirmek üçin daň atmanka turýardy we Gün ýaşandan soň ýatýardy.
Pellehanada oňa kakasy ýoldaş boldy. Olar bilelikde kenarda Amandanyň hatyrasyna liliýa çemenini goýdy.
