Gazagystana öndürijiligi, takmynan, 2 ekzaflops bolan sebitiň taryhynda ilkinji superkompýuter klasteri getirildi. Bu barada respublikanyň Sanly ösüş, innowasiýa we aerokosmos senagaty ministrliginiň metbugat gullugy habar berdi.
Superkompýuter emeli aň wezipeleri we çylşyrymly hasaplamalar üçin ýörite döredilen iň täze NVIDIA H200 grafiki çiplerine esaslanýar. Ulgam ministrligiň Tier III ygtybarlylyk derejesine laýyk gelýän täze maglumat merkezinde gurnalar we işe giriziler.
Superkompýuter diňe bir hünärmenler üçin elýeterli bolmaz. Ministrlik onuň saglygy goraýyş, energetika, bilim we döwlet hyzmatlaryny hödürlemek ýaly dürli ugurlarda ulanyljakdygyny belledi. Superkompýuterden EA-ny türgenleşdirmek üçin startaplar, ylmy gözlegler üçin uniwersitetler, iş proseslerine EA ornaşdyrmak üçin ylmy merkezler we kompaniýalar peýdalanyp biler.
Ministrlik superkompýuteriň getirilmeginiň Gazagystanda ýokary öndürijilikli hasaplaýyş ekoulgamyny döretmekde möhüm ädim bolandygyny belledi. Ilkinji gezek enjamlar paç we salgyt tölemezden getirildi, bu hem ýurdy halkara IT kompaniýalary üçin maýa goýum tarapdan has özüne çekiji edýär.
Taslama 2029-njy ýyla çenli Emeli aňy ösdürmek konsepsiýasynyň çäklerinde durmuşa geçirilýär we döwrebap IT infrastrukturasyny gurmagyň bir bölegidir.
