Hytaýyň Xiaomi kompaniýasy ýakyn on ýylda ykjam gurluşlar üçin hususy mikroçipleri işläp taýýarlamaga 50 mlrd ýuan ($6,9 mlrd) maýa goýar. Bu barada kompaniýanyň esaslandyryjysy Leý Szýun Weibo sosial ulgamynda habar berdi.
“Çip – bu biziň çykmaly bolan depämiz we eger beýik tehnologiýa kompaniýasy bolmak islesek, gaçyp bilmejek kyn göreşimiz” – diýip, Leý Szýun aýtdy.
Mundan başga-da, penşenbe güni Xiaomi özüniň ilkinji prosessoryny – Xring O1-i hödürlär. Şol gün hem kompaniýa YU7 elektromobilini tanyşdyrar. Ol hytaý bazarynda Tesla Model Y-nyň bäsdeşi bolar diýlip hasaplanýar.
Xiaomi eýýäm elektromobil bazarynda ornaşdy. Geçen ýyl kompaniýa SU7 sedanynyň satuwyna başlady we ol dekabr aýyndan bäri Hytaýda satuw boýunça Tesla Model 3-den öňe geçýär.
Duşenbe güni Gonkong biržasynda Xiaomi-niň paýnamalary 2,7% gymmatlady. Ýylyň başyndan bäri kompaniýanyň bazar bahasy bir ýarym esse ýokarlandy.
