Tutuş Ispaniýada 20-nji maýda irden ykjam telefon aragatnaşygynyň we internetiň işinde bökdençlik bolup geçdi. Bu barada El Pais gazeti habar berýär.
Britaniýanyň LBC ýaýlymynyň maglumatlaryna görä, näsazlyklar ýurduň ähli uly aragatnaşyk operatorlaryna täsir etdi: Movistar, Orange, Vodafone, Digimobil we O2. Ulanyjylardan ilkinji şikaýatlar irden sagat 5 töweregi gelip başlady. Downdetector saýtynyň bellemegine görä, ulanyjylar jaň edip, SMS kabul edip, ykjam internetden peýdalanyp bilmeýändigini habar berdi.
Aýratynam, Madrid, Barselona, Walensiýa we Sewilýa ýaly uly şäherler zyýan çekdi.
Telefonica telekommunikasion kompaniýasy bökdençligiň sebäbiniň “aragatnaşyk toruny täzelemek boýunça işler geçirilende ýüze çykan näsazlygyň” bolandygyny belleýär.
“Biz tory täzelemek boýunça käbir işleri geçirdik we ol birnäçe kompaniýada käbir hyzmatlara täsir etdi. Biz bu meseläni çözmegiň üstünde işleýäris” – diýip, kompaniýa teswir berdi.
El Pais bökdençlikleriň birnäçe awtonom jemgyýetde gyssagly gulluklaryň işine täsir edendigini belleýär. Käbir sebitlerde 112 belgisi işlemedi. Ýerli wagt bilen 09:30-a çenli (Aşgabat wagty bilen 12:30) gyssagly gulluklar bilen aragatnaşyk dikeldildi.
Bu ýurtda bir aýdan az wagtyň içinde ikinji uly bökdençlikdir. 28-nji aprelde Ispaniýada we Portugaliýada elektrik energiýasy sebit derejesinde öçdi. Şol wagt blekaut sebäpli demir ýollaryň işinde meseleler ýüze çykdy, ýüzlerçe awiagatnawlar ýatyryldy, dükanlaryň we hassahanalaryň işi togtadyldy. Elektrik energiýasynyň öçmeginiň sebäbi häzirem takyk belli däl.
