Huawei Hytaýda MateBook Fold Ultimate Design noutbugyny hödürledi. Kompaniýa ony “ýokary durulygy bolan çeýe displeýli dünýäde ilkinji PK” diýip atlandyrýar.
Noutbugyň agramy 1,16 kg, korpusynyň ýogynlygy bolsa açyk ýagdaýda 7,3 mm barabar.
Noutbuk iň ýokary ýagtylygy 1600 nit bolan iki gatly OLED displeýi we energiýany az sarp etmäge mümkinçilik berýän LTPO tehnologiýasy bilen enjamlaşdyryldy. Ekran üç gat uglerod süýümi bilen goralýar, bu hem onuň urgulara çydamlylygyny ýokarlandyrýar. Uzynlygy 285 mm bolan şarnir mehanizmi ýeňil açylyşy we gurluşyň islendik burçda berk saklanmagyny üpjün edýär. 1000°C-da taýýarlanan berk we maýyşgak sirkoniý ergininden ýasalan ok gurluşyň mäkäm ýapylmagyny üpjün edýär. Sowadyş ulgamy almaz örtükli iki alýumin wentilýatoryny we inçe radiatory öz içine alýar.
18 dýuým diagonally ekranyň durulygy 3,3K bolup, HDR-i goldaýar we DCI-P3 reňk diapazonyny öz içine alýar. Ýapyk ýagdaýda taraplaryň gatnaşygy 3:2, açyk ýagdaýda – 4:3.
MateBook Fold noutbugy HarmonyOS-da işläp, Huawei-niň beýleki gurluşlary bilen ýakyn baglanyşygy we ýokary howpsuzlyk derejesini üpjün edýär. Operasion ulgam köp derejeli şahsyýeti tassyklaýyş we kamerany, mikrofony hem geolokasiýany öçürýän ýokary gorag bilen üpjün edildi.
Hytaýda noutbuk 32 GB operatiw ýatly we 1 TB saklaýjyly wersiýa üçin 23 999 ýuan (takmynan, $3330) bahadan elýeterlidir. 2 TB-li wersiýa 26 999 ýuana (takmynan, $3745) barabar.
