Microsoft korporasiýasy täze «Copilot Voice» atly ses bilen dolandyrylýan mümkinçiligi synag edip başlady. Bu aýratynlyk Windows 11 ulanyjylaryna diňe «Hey, Copilot!» diýmek arkaly emeli aň kömekçisi bilen söhbetdeşlige başlamaga mümkinçilik berer. Windows Insider maksatnamasyna gatnaşýan ulanyjylar operasion ulgamy täzelänlerinden soň, sazlamalardan bu aýratynlygy açyp ulanyp bilerler.
Ses arkaly emeli aň kömekçisini işe girizmek Apple Siri, Amazon Alexa, Google Assistent (häzirki wagtda Gemini) ýaly hyzmatlarda eýýäm birnäçe ýyl bäri ulanylýar. Mundan ozal Microsoft-da Cortana bardy, onuň ornuna Copilot geldi. «Copilot Voice» aýratynlygy sesli kömekçi üçin ýörite täze klawişi ýa-da adaty düwmeleriň kombinasiýasyny ulanmak islemeýänler üçin has amatly bolup biler.
Täze aýratynlyk Copilot programmanyň 1.25051.10.0 we ondan ýokary wersiýalarynda sazlamalardan işjeňleşdirilýär. Täzelenme tiz wagtda iňlis dilini esasy dil hökmünde saýlan ähli Windows Insider gatnaşyjylary üçin elýeterli bolar. Funksiýa işjeňleşdirilenden soň, ekranyň aşagynda mikrofonly Copilot wijeti peýda bolýar we onuň işjeňdigi baradaky bildiriş görkezilýär. Bu programmada ses maglumatlary diňe enjamyň özünde, ýerli ýagdaýda işlenýär we 10 sekunt saklanýar, ýagny ses ýazgylary hiç ýere iberilmeýär hem-de bulut ulgamynda saklanmaýar. Ses bilen işjeňleşdirme internete birikmezden hem işleýär, ýöne Copilot-yň doly mümkinçiliklerinden peýdalanmak üçin internet zerur, sebäbi onuň emeli aň ulgamy bulut arkaly ýerleşýär.
