Amerikanyň Birleşen Ştatlarynda 97 ýaşly Žaklin Kimmelstil Maunt-Sent-Winset uniwersitetiniň diplomyny aldy. Bu ýokary okuw mekdebi onuň Ikinji Jahan urşunyň kynçylyklary sebäpli hasyl bolmadyk arzuwyny amala aşyrmak kararyna geldi diýip, Nýu-Ýork Post ýazýar.
Žaklin 1927-nji ýylda Margit ady bilen Frankfurtda dünýä inipdir. Ol 12 ýaşyndaka maşgalasynyň milletçileriň yzarlamalaryndan halas bolmagy üçin mekdebi taşlamaly bolupdyr. Gyz ybadathanada gizlenip, soňra Fransiýada ýaşapdyr. 1947-nji ýylda ABŞ göçüpdir, ýöne okuwyna dolanyp baryp bilmändir.
Žaklin eýýäm garrylyk döwründe RiverSpring Living garrylar öýüne düşüp, öz arzuwyny paýlaşypdyr.
"Ol maňa diňe 12 ýaşyna çenli mekdebe gatnandygynyň ony hemişe biynjalyk edýändigini aýtdy. Biz hem bu babatda bir zatlar etmek kararyna geldik" – diýip, edaranyň işgäri Wendi Staýnberg gürrüň berdi. Şonda RiverSpring Living kömek sorap uniwersitete ýüz tutýar.
Žaklin iňlis edebiýaty we fransuz dili sapaklaryna çagyryldy. Esli ýylyň geçendigine garamazdan, fransuz dili gowy ýadynda galan eken. Sapaklaryndan soň Kimmelstil basketbol oýnuna bardy, şol ýerde ony toparyň tumary etdiler we kollejiň eşigini berdiler.
97 ýaşly talybyň okuw güni diplom gowşurylyş dabarasy bilen tamamlandy. Bu onuň üçin aýratyn ýatda galyjy pursat boldy. Žaklin: "Men size diňe bir zady aýtmak isleýän, şeýle ezizlenmek we bu ajaýyp zatlaryň hemmesini görmek nähili ýakymly" -diýdi.
Uniwersitetiň prezidenti Sýuzan Berns Ikinji Jahan urşunyň kynçylyklaryndan halas bolan Žakliniň hiç haçan ynsançylyga bolan ynamyny we gowulyklara umydyny ýitirmändigini, munda oňa hemişe ýokary bilim almaga bolan arzuwynyň goldaw berendigini belledi.
Dabara Kimmelstiliň agtyklary Jona we Rebekka gatnaşdy. Olar mähriban enesiniň talyplyk tejribesini begenç bilen synladylar.
"Bu hakykatdanam üýtgeşik bir zat" – diýip, Rebekka begenjini paýlaşdy.
