Londonyň “Kristal Pelas” futbol kluby finalda “Mançester Sitini” 1:0 hasabynda utup, Angliýanyň Kubogynyň eýesi boldy.
Oýun “Uembli” stadionynda geçirildi. Ýeke-täk goly 16-njy minutda “Kristal Pelasyň” ýarymgoragçysy Ebereçi Eze geçirdi. 36-njy minutda “ManSitiniň” hüjümçisi Omar Marmuş penaltiden gol geçirip bilmedi – garşydaş toparyň derwezebany Din Henderson urgyny yzyna gaýtardy. Ikinji ýarymda London toparynyň goragçysy Daniel Munýosyň goly VAR-a seredilenden soň ýatyryldy.
Angliýanyň Kubogy klubuň 120 ýyllyk taryhynda ilkinji möhüm baýrak boldy. 1905-nji ýylda döredilen topar mundan öň diňe iki gezek – 1990-njy we 2016-njy ýyllarda finala çykypdy.
Angliýanyň Kubogy ýaryşynyň dowamynda “bürgütler” diňe bir gol geçirtdi. Olar kuboga tarap ýolda “Stokport Kaunti”, “Donkaster Rowers”, “Milluol”, “Fulhem” we “Aston Willa” toparlaryny utdy.
Angliýanyň Kubogynda gazanylan ýeňiş kluba indiki möwsümde Ýewropa ligasynda oýnamaga hukuk berýär. Bu “Kristal Pelasyň” ýewrokuboklarda ilkinji çykyşy bolar.
Häzir topar Angliýanyň çempionatynda möwsümiň gutarmagyna iki oýun galanda 12-nji orny eýeleýär.
