Los-Anjelesde geçiriljek Olimpiýa we Paralimpiýa oýunlarynyň guramaçylyk komiteti Archer Aviation kompaniýasy bilen hyzmatdaşlyga girdi. BBC-niň habar bermegine görä, esasy Olimpiýa desgalarynyň arasynda tomaşaçylary gatnatmak üçin howa taksisini ulanmak meýilleşdirilýär.
Ilkibaşda bu ulag görnüşini Parižde geçirilen Olimpiada-2024-de synamak islediler, ýöne taslama zerur şahadatnamalary alyp ýetişmedi.
Indi Archer Aviation ABŞ-nyň Federal raýat awiasiýasy edarasynyň (FAA) tassyklamagyna garaşýar. Kompaniýa aerotaksi hyzmatyny Los-Anjelesde Olimpiada başlanýança işe girizmek isleýär, şonuň üçin eýýäm 2025-nji ýylda ygtyýarnama almagy göz öňünde tutýar.
Uçuş 10-20 minut dowam edip biler. Aerotaksini ýörite programmanyň üsti bilen sargyt etmek bolar.
Archer Aviation-yň baş direktory Adam Goldşteýniň aýtmagyna görä, ýol tölegi premium Uber-iň nyrhlary bilen deň bolar.
Ulanylmagy meýilleşdirilýän eVTOL Midnight modeli dört ýolagça niýetlenýär. Enjam dikuçar ýaly dik uçýar we gonýar, ýöne elektrik hereketlendirijileriniň we zyňyndylaryň azalmagynyň hasabyna sessiz we arassa işleýär.
Uçýan ulaglary ösdürmäge diňe bir hususy kompaniýalar gyzyklanma bildirmeýär. Beýik Britaniýada “Uçuşlaryň geljegi” döwlet maksatnamasynyň çäklerinde aerotaksileriň eýýäm 2026-njy ýyla çenli asmana galjakdygy we geljekde hereket etmegiň adaty usulyna öwrüljekdigi çaklanylýar.
