OpenAI kompaniýasy ChatGPT hyzmatynda GPT-4.1 we GPT-4.1 mini modellerini çykardy. Kompaniýa X sosial ulgamynda täze modelleriň ilkinji nobatda kod ýazmak we düzetmek boýunça gurallara zerurlygy bolan programmistlere gönükdirilendigini habar berdi.
GPT-4.1 modeli has tiz işleýär we programmirleme hem görkezmeleri ýerine ýetirmek meselelerinde GPT-4o-dan öňe geçýär. Ol ChatGPT Plus, Pro we Team ulanyjylary üçin elýeterlidir. GPT-4.1 mini modeliniň kuwwaty biraz pes bolup, ähli ulanyjylar, şol sanda mugt ulanyjylar üçin hem açykdyr. GPT-4.0 mini modeli indi goldanylmaýar we ChatGPT-den aýryldy.
GPT-4.1 we GPT-4.1 mini ilkinji gezek 2025-nji ýylyň aprel aýynda görkezildi, ýöne şol wagt olar diňe API arkaly işläp düzüjiler üçin elýeterlidi. Bu modelleriň işe girizilmegi tankyda getirdi, çünki OpenAI modelleriň howpsuzlygy barada hasabatyny hödürlemedi.
OpenAI-iň howpsuzlyk bölüminiň ýolbaşçysy Ýohannes Haýdeke GPT-4.1 modeliniň täze mümkinçiliklere eýe däldigini we aň taýdan GPT-4o modelinden öňe geçmeýändigini belledi. Ol modeliň howpsuzlyk meselesiniň möhümdigini, ýöne onuň has kuwwatly boljak indiki nesil modellerinden tapawutlanýandygyny aýtdy.
Indi OpenAI täze “Safety Evaluations Hub” çeşmesinde howpsuzlyk synaglarynyň netijelerini ýerleşdirip, aç-açanlygy ýokarlandyrmagy meýilleşdirýär.
GPT-4.1-iň işe girizilmegi işläp düzüjiler üçin EA gurallaryna bolan gyzyklanmanyň artýan döwründe bolup geçýär. KHBS OpenAI-iň 3 mlrd dollara meşhur Windsurf programmirleme guralyny satyn almaga ýakyndygyny habar berýär.
