Samsung şu hepde ýogynlygy 5,85 mm bolan Galaxy S25 Edge smartfonyny hödürledi. Şondan soň, kompaniýa iki wideo çykaryp, onda öz smartfonynyň ýeňil agramyna we inçeligine ünsi çekip, ony iPhone 16 Pro bilen deňeşdirdi.
Samsung tarapyndan Instagram-da ýerleşdirilen birinji wideoda geliý şarlarynyň kömegi bilen howada gaýýan iki smartfon görkezilýär. Galaxy S25 Edge-e 61 şar, iPhone-a hem şonça şar berkidilen. Ýuwaş-ýuwaşdan bu şarlar deşilip başlaýar. Netijede, iPhone aşak düşüp başlaýar, Galaxy S25 Edge bolsa az sanly şarlar bilen howada gaýmagyny dowam etdirýär. Bu hem Galaxy S25 Edge-iň agramynyň ýeňildigini görkezýär. Belläp geçsek, bu smartfonyň agramy 163 g, iPhone 16 Pro – 199 g barabar.
Ikinji wideoda smartfonlar konweýer lentasy boýunça hereket edip, kem-kemden daralýan yşlardan geçýär. Galaxy S25 Edge 5,8 mm aralykdan geçýär, iPhone 16 bolsa 8 mm aralykda saklanyp galýar.
Belläp geçsek, Samsung inçe korpusy döretmek üçin käbir aýratynlyklardan geçmeli boldy. Galaxy S25 Edge-iň akkumulýatorynyň sygymy 3900 mA/sag bolup, bu adaty Galaxy S25-den has azdyr. Esasy kamera iki bölekden durýar, zarýad kuwwaty bolsa Galaxy S25 Ultra-daky 45 Wt bilen deňeşdirilende 25 Wt bilen çäklenýär.
Geljekde Galaxy S25 Edge-iň bäsdeşi peýda bolup biler. Gürrüňlere görä, Apple korpusynyň ýogynlygy 5,5 – 5,65 mm bolan iPhone 17 Air-i taýýarlaýar. Onuň reliziniň 2025-nji ýylyň ikinji ýarymynda bolmagyna garaşylýar. Bu barada giňişleýin maglumat heniz ýok.
