Abu-Dabide Ýakyn Gündogarda ilkinji Disney dynç alyş seýilgähiniň açylyşy boldy. Bu waka mynasybetli Dubaýyň Lumasky kompaniýasy 9000 dronyň gatnaşmagy bilen uly yşyk şüweleňini geçirdi.
Gijeki asmanda dronlar Zoluşkanyň galasyny we Disney dünýäsinden beýleki obrazlary şekillendirdi. Her enjam örän ýagty yşyk diodlary bilen enjamlaşdyryldy we ägirt üç ölçegli ekranda piksel ýaly hereket etdi. Umuman alanyňda, dronlar 4 milliarddan gowrak reňk utgaşmasyny görkezdi.
Şüweleň sebitde iň ulusy boldy. Oňa Disney-iň suratkeşleri we horeograflary goldaw berdi. Her bir drony takyk ýerleşdirmek üçin GPS we RTK tehnologiýalary ulanyldy. Bu hem birnäçe santimetre çenli takyklyga ýetmäge mümkinçilik berdi. Mundan başga-da, sähel gijikdirmeleri hem aradan aýyrýan sinhronlaşdyrma ulgamy ulanyldy. Dronlaryň bir bölegi asmana feýerwerk goýberdi.
Lumasky enjamlary ýörite çykyşlar üçin niýetlenendir. Ýeňil korpusynyň we kuwwatly prosessorynyň netijesinde olar çylşyrymly şekilleri emele getirýär. Ähli sahnalar ilkibaşda 3D görnüşinde modelirlendi. Şüweleňiň üstünde Disney Imagineers – animasiýa we sahna goýmak boýunça hünärmenler hem işledi.
Disney-iň täze tematiki seýilgähi dünýäde ýedinji we Ýakyn Gündogarda ilkinji boldy. Onuň açylyşy BAE-niň medeni syýahatçylygy ösdürmek strategiýasynyň bir bölegidir.
Bu şüweleň eýýäm Olimpiadalardan başlap, Pariž Disneýlendindäki şüweleňe çenli iň gowy dünýä taslamalary bilen deňeşdirilýär.
