16-njy maýda ABŞ-da “Ahyrky nokat: Gan baglanyşyklary” (Пункт назначения: Кровные узы) horror filminiň altynjy bölümi prokata çykýar. Deslapky görkezilişde filme tomaşa eden günbatar tankytçylary oňa franşizada iň ýokary bahany berdi.
Rotten Tomatoes saýtynda filmiň reýtingi 92%-e, Metacritic-de bolsa 100-den 74 bala ýetdi. Bu görkezijiler hem franşizanyň öňki filmleriniň netijesinden ýokary boldy.
Sýužet boýunça talyp gyz Stefani (Keýtlin Santa Huana) öz maşgalasyndaky ölüm zynjyryny üzmek üçin dogduk şäherine dolanýar.
Morg işgäri Uilýam Blauortyň keşbine Toni Todd gaýdyp geldi. Onuň personažy “Ahyrky nokadyň” doly manysynda nyşanyna öwrüldi. Bu aktýoryň ekranda iň soňky çykyşy boldy, ol 2024-nji ýylyň noýabrynda aradan çykdy, film hem onuň hatyrasyna bagyşlandy.
The Hollywood Reporter-iň synyna görä, filmdäki ölümler “şeýle bir ussatlyk bilen gurnalypdyr welin, deslapky görkezişde tomaşaçylar olaryň her birine wokal-tans çykyşy ýaly el çarpdy”.
“Duşda typandygyňy ýa-da awtobusyň aşagyna düşendigiňi göz öňüne getirmek aňsat. “Ahyrky nokat” seriýasynyň filmleri bu adaty howsalalary güýçlendirýär we olary çäksiz derejä ýetirýär, netijede siz özüňi ýitirmek ýagdaýyna düşýärsiňiz” – diýip, tankytçy Frenk Şek belleýär.
Filmiň režissýorlary Zak Lipowski we Adam B.Steýn boldy, olar “Özgeler” serialy bilen tanalýar.
2000-nji ýyldan 2011-nji ýyl aralygynda çykan “Ahyrky nokat” franşizasy dünýä prokatynda jemi 657 mln dollar ýygnady.
