“Bolonýa” tutuş ýaryşyň dowamynda diňe bir gol geçirdip, Italiýanyň Kubogynyň eýesi boldy. Finalda boloniýalylar “Milany” 1:0 hasabynda utdy.
“Bolonýa” şu möwsümiň Kubok ýaryşynda ýeke-täk topy ýarym final tapgyrynyň “Empoli” bilen jogap oýnunda (2:1) sypdyrdy – goly ýarymgoragçy Wiktor Kowalenko geçirdi. Iki oýundan ybarat gapma-garşylyk “Bolonýanyň” 5:1 hasabynda utmagy bilen tamamlandy.
Geçen tapgyrlarda Winçenso Italýanonyň topary “Atalantany” (1:0) we “Monsany” (4:0) utdy.
Pazzi di Fanta bilen söhbetdeşlikde Italýano toparyň gowy möwsümi geçirendigini we ähli güýjüni meýdançada galdyrandygyny belledi.
“Bolonýa” üçin bu Italiýanyň Kubogynyň taryhynda üçünji we 1973/74 möwsüminden bäri ilkinji boldy.
Ýeri gelende belläp geçsek, A Seriýada “Bolonýanyň” we “Milanyň” netijeleri gowy däl – möwsümiň gutarmagyna iki tapgyr galanda toparyň ikisi-de ýewrokubok zolagynyň daşynda, şonuň üçin Kubokdaky ýeňiş Ýewropa ligasyna ýollanma almak üçin mümkinçilik boldy. “Bolonýa” 62 utuk bilen 7-nji, “Milan” bolsa 60 utuk bilen 8-nji orny eýeleýär.
