Apple kompaniýasy Synchron neýrotehnologiýa startapy bilen bilelikde iPhone, iPad we beýleki gurluşlary pikiriň güýji bilen dolandyrmaga mümkinçilik berýän “beýni-kompýuter” (BCI) interfeýsini işläp taýýarlaýar. Bu barada The Wall Street Journal neşiri habar berdi.
Bu tehnologiýa Synchron tarapyndan döredilen Stentrode implantyna esaslanýar. Stentrode boýun wenasy arkaly beýniniň hereketlendiriji böleginiň gapdalyndaky damarda oturdylýar. Gurluşda hereket bilen bagly signallary tutýan 16 elektrod bar. Bu signallar tehnikany dolandyrmak üçin buýruklara öwrülýär. Implant beýnä hirurgiýa gatyşygyny talap etmeýär.
Tehnologiýa, ilkinji nobatda, agyr hereket bozulmalary bolan adamlar, şol sanda amiotrofik gapdal sklerozly hassalar üçin niýetlenýär.
2019-njy ýyldan bäri Synchron şeýle gurluşlary on hassa oturtdy. Kompaniýa amerikan düzgünleşdirijisinden kliniki synaglary geçirmäge rugsat aldy. Hassalaryň biri – Pensilwaniýanyň amiotrofik gapdal sklerozly ýaşaýjysy eýýäm diňe pikiriň güýji bilen Apple Vision Pro-ny we beýleki gajetleri dolandyrýar.
Apple bu tehnologiýany eýýäm dolandyryşyň adaty däl usullaryny ulanmaga mümkinçilik berýän Switch Control ulgamyna birleşdirmegi meýilleşdirýär.
Synchron-yň işläp taýýarlamasy Neuralink ýaly çözgütlerden tapawutlanýar. Neuralink N1 gurluşy gönüden-göni beýni dokumasyna oturdylýar we ol 1000-den gowrak elektrody öz içine alýar. Ol has takyk bolup, kursory üýtgetmäge we teksti girizmäge mümkinçilik berýär. Şol bir wagtyň özünde, Synchron tehnologiýasyny oturtmak ýeňil, bu hem ony has elýeterli edýär.
