Apple iOS 18.5 täzelenmesini çykardy. Esasy täzelikleriň biri iPhone 13, şol sanda mini, Pro we Pro Max wersiýalary üçin habarnamalary hemra arkaly ibermek mümkinçiligi boldy.
Hyzmat Starlink tehnologiýasynyň esasynda T-Mobile operatory tarapyndan üpjün edilýär. The Verge-iň habar bermegine görä, ol ABŞ-da elýeterli we iýul aýynda synag döwri tamamlanýança mugt işleýär.
Ýöne Apple gürrüňiň üçünji tarap hemra funksiýalary barada gidýändigini belleýär, ýagny kompaniýanyň bu hyzmat bilen hiç hili baglanyşygy ýok. Kompaniýanyň hemra arkaly öz hyzmatlary, mysal üçin, “Gyssagy jaň – SOS” diňe iPhone 14 we has täze modeller üçin elýeterli bolup galýar.
Hemra aragatnaşygyndan başga-da, iOS 18.5 beýleki täzelikleri öz içine alýar. Ulgamda eger çaga “Ekran wagtyna” (Screen Time) girmek üçin parol ulansa, ene-atalara duýdurýan funksiýa peýda boldy. Şeýle-de, indi beýleki gurluşlarda Apple TV görlende kontent satyn almak üçin “iPhone arkaly satyn almak” aýratynlygyndan peýdalanyp bolýar. Bu göni iPhone-dan tölemäge mümkinçilik berýär.
Mundan başga-da, täzelenme Apple Vision Pro programmasynyň gara ekrany görkezmegine sebäp bolýan näsazlygy düzedýär.
Apple iOS 18.5 bilen bir hatarda macOS Sequoia 15.5 we watchOS 11.5 täzelenmelerini çykardy.
